Иранскиот министер за надворешни работи, Абас Аракчи, ја информираше високата претставничка на ЕУ за надворешни работи и безбедносна политика, Каја Калас, за подготвеноста на Техеран да ги продолжи разговорите за својата нуклеарна програма, под услов Западот да покаже добра волја.
Како одговор на најавата на „европската тројка“ (Франција, Германија и Обединетото Кралство) за започнување „механизам за брза реакција“ и обновување на санкциите врз Иран, Аракчи „ја повтори подготвеноста на Иран да продолжи со фер и избалансирани дипломатски преговори, под услов другите страни да покажат сериозност и добра волја и да избегнат дејствија што ги поткопуваат шансите за успех“, објави новинската агенција Тасним.
„Ја повикуваме Европската Унија да се откаже од селективните толкувања и да се фокусира на олеснување на вистинската дипломатија со цел да се одржи мултилатерализмот“, се вели во писмото до европскиот министер за надворешни работи, пренесува Танјуг.
Аракчи потсети дека земјите од ЕУ3 немаат законско овластување да го активираат механизмот и предупреди дека Техеран ќе преземе мерки како одговор на оваа одлука. Претставници на Франција, Германија и Обединетото Кралство во четврток испратија писмо до членовите на Советот за безбедност на ОН во кое ги информираат за започнувањето на „механизмот за брза реакција“ (snapback) што овозможува обновување на санкциите против Иран, суспендирани според Заедничкиот сеопфатен план за акција (JCPOA) од 2015 година.
Во исто време, страните изразија подготвеност да преговараат со Иран за нуклеарен договор во следните 30 дена пред стапувањето во сила на санкциите. Доколку не се постигне договор во рок од 30 дена, сите претходни санкции на ОН ќе бидат вратени, вклучително и ембарго за оружје врз Иран, инспекции на товар и ограничувања на неговата ракетна програма.