Израелски авиони и тенкови ги бомбардираа источните и северните периферии на градот Газа, уништувајќи неколку згради и домови, изјавија жителите денес, додека Израел ја засилува планираната офанзива врз градот. Сведоци изјавија дека експлозии одекнувале во областите Зејтун и Шеџаја, додека тенкови гранатирале куќи и патишта во блиската населба Сабр, а неколку згради биле разнесени во северниот град Џабалија, објави Ројтерс.
👀 Jabalia, Gaza Strip pic.twitter.com/AnBpWujQgQ
— Conflict Radar (@Conflict_Radar) August 24, 2025
Израелската војска во понеделник соопшти дека нејзините сили продолжиле со операциите во Џабалија во последните денови за откривање на тунели што ги користат милитантите на Хамас и за зајакнување на контролата врз областа. Додаде дека операциите во Џабалија ги спречуваат терористите на Хамас да се вратат во областа.
Израел претходно овој месец усвои план за преземање на контролата врз градот Газа, кој го опиша како последно упориште на Хамас. Операцијата треба да започне за неколку недели, оставајќи простор за медијаторите Египет и Катар да се обидат да ги доведат двете завојувани страни на преговори за примирје, потсетува Ројтерс.
Израелскиот министер за одбрана Израел Кац вети во петокот дека ќе ја спроведе офанзивата, чие започнување предизвика загриженост во странство и негодување дома. Тој во петокот изјави дека градот Газа ќе биде срамнет со земја доколку Хамас не се согласи да ја заврши војната според условите на Израел и да ги ослободи сите заложници што сè уште ги држи. Околу половина од двата милиони жители на палестинската енклава живеат во градот Газа, а неколку илјади веќе ја напуштиле. Сепак, некои жители велат дека нема да заминат, без оглед на ризикот, јавува агенцијата.