Рускиот министер за надворешни работи Сергеј Лавров изјави дека европските земји би можеле да доцнат со своите планови за признавање на Палестина, бидејќи ситуацијата на терен брзо се влошува.
„Додека Европа конечно одлучи за два месеци да ја признае Палестина, можеби нема да остане ништо за признавање“, рече Лавров по средбата со јорданскиот вицепремиер и министер за надворешни работи Ајман ал-Сафади.
Шефот на руската дипломатија нагласи дека е потребно веднаш да се започне со обновување на директните преговори меѓу Израел и Палестинците, во согласност со резолуциите на Обединетите нации. Според него, клучно е да се разговара за создавање независна палестинска држава, бидејќи без неа регионот останува во состојба на постојана нестабилност.
Лавров предупреди дека отсуството на политичко решение неизбежно ќе доведе до нови бранови протести, вклучувајќи насилни, па дури и вооружени конфликти.
„Мораме да бидеме искрени и да признаеме дека овие ризици нема да исчезнат“, рече тој.
Во меѓувреме, извори од египетскиот телевизиски канал Ал-Кахир ал-Ихбарија објавија дека Хамас дал позитивен одговор на предлогот за прекин на огнот во Појасот Газа.
Според договорот, милитантното крило на Хамас се согласило да ослободи половина од израелските заложници за време на 60-дневното примирје во замена за одреден број палестински затвореници.
Спогодбата, исто така, предвидува повлекување на израелските сили кон границите на Појасот Газа со цел да се овозможи непречено доставување на хуманитарната помош. По прекинот на огнот, се очекува Хамас и Израел да започнат преговори за траен прекин на огнот и сеопфатен мировен договор.