Попладнево во близина на скопското село Мршевци, Општина Илинден изби силен пожар, кој поради ветерот брзо се прошири на околината.
Поради силниот ветер пожарот е проширен кон селото Бујковци и кон индустриската зона, информира директорот на Дирекцијата за заштита и спасување (ДЗС), Стојанче Ангелов.
– Според информациите кои ги имам, за жал, од пожарот делумно е зафатен покривот на црквата кај селото Мршевци, а други штети се уште не се пријавени, изјави Ангелов.
Тој посочи дека од густиот чад на автопатот Скопје-Куманово имаше намалена видливост, поради што дојде и до сообраќајна несреќа, па автопатот сè уште е затворен во двата правци.
-Поради силниот ветер не може да полетаат „ер-тракторите“ на ДЗС и хеликоптерите на Полицијата и Армијата и да се вклучат во гасење. На терен се скопската Пожарна, но и локално население. Со тешка маханизација се прават препреки пожарот да не се прошири, рече Ангелов и додаде дека во моментот кога ветрот ќе намали ќе полетаат „ер-тракторите“ на ДЗС и Армијата.
Според Центарот за управување со кризи (ЦУК), во земјава има 11 активни пожари.