Русија значително ги прошири своите капацитети за беспилотни летала за војната во Украина благодарение на кинеските компании кои официјално негираат соработка со Москва, открива истрага на Блумберг врз основа на интерни документи од руската компанија Аеро-ХИТ и преписка со руски владини претставници.
Аеро-ХИТ, релативно непозната компанија со седиште во градот Хабаровск на Далечниот Исток, започна да работи со кинески фирми во 2022 година, откако Русија започна целосна инвазија на Украина, со цел да воспостави масовно производство на беспилотни летала за борбена употреба на фронтовските линии.
Компанијата тврди дека има производствен капацитет до 10.000 беспилотни летала месечно до 2025 година, со планови за развој на понапредни модели.
Според документите до кои дојде Блумберг, Аеро-ХИТ соработува со инженери од кинеската компанија Аутел од почетокот на 2023 година за локализирање на производството на дронот Аутел EVO Max 4T во Русија.
Основата на арсеналот на Аеро-ХИТ е дронот „Велес“, модел на FPV базиран на кинескиот Autel EVO Max 4T, кој првично беше дизајниран за цивилна употреба.