Еден ден откако високи ирански функционери, вклучувајќи го и претседателот, потврдија прекин на огнот меѓу Иран и Израел, нема јавна изјава од врховниот лидер ајатолахот Али Хамнеи.
Тој го има последниот збор во Иран за сите клучни државни прашања.
Како што објавува Би-Би-Си, очите на јавноста во и надвор од Иран сега се насочени кон реакцијата на Хамнеи. Последен пат се појави на државната телевизија на 18 јуни, во однапред снимена порака во која го отфрли повикот на американскиот претседател Доналд Трамп за „безусловно предавање“.
Тој не е виден во јавноста од израелскиот напад врз Иран на 13 јуни, кога беше емитувана уште една снимена порака. Неговите официјални објави на платформата X беа активни до прекинот на огнот, но оттогаш нема нови појавувања.
Последните фотографии на кои се гледа во јавна средина датираат од 11 јуни, кога се сретна со членови на иранскиот парламент.