Британската влада се закани дека ќе го тужи поранешниот сопственик на фудбалскиот клуб Челзи, Роман Абрамович, за да се осигура дека парите од продажбата на клубот ќе завршат во Украина.
2,5 милијарди фунти од продажбата на клубот се замрзнати на банкарска сметка во Велика Британија. Британската влада сака парите да одат за хуманитарна помош за Украина, но Абрамович рече дека сака тие да бидат наменети за „сите жртви на војната во Украина“.
„Иако вратата на преговорите ќе остане отворена, ние сме целосно подготвени да го однесеме ова пред судовите доколку е потребно“, порачаа во заедничката изјава министерот за финансии Рејчел Ривс и министерот за надворешни работи Дејвид Лами.
Тие нагласија дека сакаат да „обезбедат луѓето што страдаат во Украина да имаат корист од овие пари што е можно поскоро“. „Владата е решена дека средствата од продажбата на фудбалскиот клуб Челзи ќе бидат наменети за хуманитарни цели во Украина. Длабоко сме фрустрирани што досега не беше можно да се постигне договор за ова со господинот Абрамович“, додаваат тие.
Доцнењето на исплатата на средствата е предизвикано од несогласување меѓу британската влада и адвокатите на Абрамович. Абрамович, руски милијардер кој своето богатство го заработил во нафта и гас, доби специјална дозвола да го продаде Челзи по руската инвазија на Украина, под услов да докаже дека нема да има финансиска корист од продажбата.
Тој често е обвинет дека одржува силни врски со рускиот претседател Владимир Путин, што тој го негира. Тој не може да пристапи до приходите од продажбата на клубот, но парите сепак законски му припаѓаат. Кога ја објави својата одлука да го продаде клубот, тој најави дека приходите од продажбата ќе бидат донирани преку фондација „за добробит на сите жртви од војната во Украина“, која ќе ги вклучи и оние во Русија.
Британската влада се спротивстави на ова и тврдеше дека средствата треба да се трошат само за хуманитарни напори во Украина.