Руската делегација е подготвена да отпатува за Истанбул и да ги продолжи преговорите со своите украински колеги, изјави вчера на брифинг за медиумите портпаролот на рускиот претседател Дмитриј Песков.
„Денес сакав да ве известам дека нашата делегација, руската делегација на преговарачи, заминува за Истанбул“, рече Песков, додавајќи дека сè ќе биде подготвено за втората рунда преговори што ќе продолжи во понеделник наутро, објави Тасс.
Песков нагласи дека нацрт-меморандумот меѓу Русија и Украина со нивниот предлог за решение за прекин на огнот нема да биде објавен.
Кремљ соопшти дека Русија сè уште не добила позитивен одговор од Украина на нејзиниот предлог за одржување на преговорите во Истанбул на 2 јуни.
Турскиот министер за надворешни работи Хакан Фидан изјави на прес-конференција во Киев дека Анкара сака да биде домаќин на самит меѓу лидерите на двете земји потоа, со присуство на турскиот и американскиот претседател Реџеп Таип Ердоган и Доналд Трамп, објави Ројтерс.
Тој рече дека разговорите меѓу Русија и Украина во Истанбул на 16 мај се првиот директен контакт меѓу двете земји за три години и означиле нов почеток.
„Украинскиот меморандум за решавање на конфликтот со Русија предвидува прекин на огнот на копно, море и во воздух“, објави „Њујорк тајмс“, цитирајќи неименуван украински функционер.
Во исто време, украинскиот министер за надворешни работи Андриј Сибиха ја обвини Русија за одложување на мировните преговори, велејќи дека Москва сè уште не доставила ветен меморандум во кој ги наведува своите мировни услови.
Претставникот на Соединетите Американски Држави во Советот за безбедност на Обединетите нации, Џон Кели, рече дека предлогот на Соединетите Американски Држави за прекин на огнот во Украина е „најдобриот можен исход за Русија“ и дека рускиот претседател Владимир Путин треба да го прифати договорот. Кели истакна дека првиот чекор што го презедоа Соединетите Американски Држави беше да предложат итно, безусловно и сеопфатно прекин на огнот, кое Украина го прифати, во исчекување на согласноста на Русија.
„Оттогаш ја повикуваме Русија да го прифати прекинот на огнот. Доколку Русија донесе погрешна одлука да ја продолжи оваа катастрофална војна, Соединетите Американски Држави ќе мора да размислат за повлекување од нашите преговарачки напори за прекин на овој конфликт“, предупреди Кели, додавајќи дека Вашингтон би можел да воведе нови санкции врз Москва.
САД сакаат Русија да се согласи на сеопфатен 30-дневен прекин на огнот со Украина на копно, во воздух, на море и во критичната инфраструктура.