Автобус од возниот парк за потребите на Олимписките Игри во Лондон, кој се користи за превезување на гостите на Олимпијадата, предизвика сообраќајна несреќа во која загина еден лондонски велосипедист.
Несреќата се случи синоќа во источнолондонската општина Хакни, во непосредна близина на Олимпискиот Парк. На помош беше повикана хеликоптерска брза помош за да му се помогне на велосипедистот, но лекарите кои набргу стигнаа на местото на инцидентот можеа само да констатираат дека тој починал веднаш по ударот со автобусот.
Идентитетот на жртвата не е соопштен, освен што е потврдено дека станува збор за маж на триесетина години. Полицијата не дава детали за тоа како дошло до сударот, но го уапси возачот на автобусот.
Возилото превезувало претставници на медиумите од разни земји во светот, а претставник на Организацискиот комитет на Игрите денеска изрази жалење поради инцидентот во кој загина човек.
Британскиот велосипедист Бредли Вигинс, кој вчера освои златен медал во трката на хронометар, а пред една недела победи на „Тур де Франс“, изјави дека велосипедизмот е опасен спорт. Тој побара построги прописи при возењето на велосипед низ патиштата и низ Лондон, со задолжително носење кацига, како и забрана на слушање музика во текот на возењето.
Построгите прописи може да спасат многу животи на британските патишта и по улиците на градовите, истакна олимпискиот шампион.