Кинескиот претседател Си Џинпинг пристигна во Москва на почетокот на четиридневната посета за да присуствува на руската воена парада по повод годишнината од крајот на Втората светска војна, познат во Русија како Ден на победата, пишува „Гардијан“.
Доаѓањето на кинескиот лидер се совпадна со нападите со украински беспилотни летала врз руската престолнина.
Градоначалникот на Москва – Сергеј Собјанин изјави дека руските единици за воздушна одбрана уништиле најмалку 14 украински беспилотни летала во текот на ноќта.
Нападите принудија затворање на повеќето аеродроми во Москва, а рускиот национален авиопревозник „Аерофлот“ соопшти дека го менува својот распоред за да се справи со прекинот.
Посетата на Си Џинпинг, која доаѓа во време кога Кина е вовлечена во трговска војна со САД и набргу откако Украина ја обвини Кина дека директно ја помага руската инвазија, го нагласува неговиот близок однос со Владимир Путин.
Ова е 11-та посета на Си на Русија – повеќе од која било друга земја – откако стана претседател.
Руското Министерство за надворешни работи го опиша патувањето како „еден од централните настани во руско-кинеските односи оваа година“.
Се очекува Си да потпише бројни договори за соработка, продлабочувајќи ги односите меѓу Кина и Русија „без задржување“.