Маж од Илиноис е осуден на 53 години затвор за убиство на шестгодишно момче со палестинско-американско потекло и тешко ранување на неговата мајка во напад на омраза што го изврши во октомври 2023 година, објавија денеска американските медиуми.
Неколку дена откако Израел започна војна во Појасот Газа по нападот на палестинските милитанти Хамас врз јужен Израел на 7 октомври 2023 година, Џозеф Чуба (73) го избоде и уби момчето Вади Алфајуми, а со нож ја нападна и неговата мајка Ханан Шахин, пренесува Ројтерс.
Обвинителите рекоа дека нападот со нож, едно од првите и најлошите злосторства од омраза во САД од почетокот на војната во окупираната палестинска енклава, бил мотивиран од омраза кон муслиманите.
Американските организации кои се борат за човекови права предупредија на порастот на исламофобијата, омразата кон Арапите и антисемитизмот.
Чуба го избодел момчето 26 пати со воен нож од 18 сантиметри, соопштија властите.
Шахин претрпелa повеќе убодни рани во нападот што се случи во Плејнфилд, околу 40 милји југозападно од Чикаго.