Во Мадрид, главниот град на Шпанија, забележани се необични гужви, но не поради приливот на туристи туку поради големиот прекин на електричната енергија што ја погоди оваа земја денеска.
Слична сцена е снимена и во соседна Португалија.
Поради големиот прекин на електричната енергија, летовите беа прекинати, стотици дефекти на лифтови беа пријавени, луѓето во метрото беа евакуирани, тенискиот турнир во Мадрид е одложен, а многу болници работат со помош на резервни извори на струја.
Шефот на шпанската електроенергетска мрежа најави дека се работи на отстранување на дефектот и дека електричната енергија е вратена на југот и северот на земјата.
Португалскиот мрежен оператор REN тврди дека прекините на електричната енергија се резултат на „дефект во шпанската електрична мрежа“ и се поврзани со „редок атмосферски феномен“, но не прецизираше што точно тоа значи.
Шпанија сè уште не одговори за овие тврдења.
Многу бизниси, продавници и ресторани во Мадрид останаа во мрак поради прекин на струјата.
Персоналот мораше да ја заврши работата со фенер.
Градоначалникот на Мадрид ги предупреди жителите да се држат надвор од патиштата и да контактираат со властите во итен случај.