Европската комисија сигнализираше отвореност за нови начини на финансирање на одбраната во Источна Европа со цел зајакнување на источните граници на НАТО во светло на руската агресија, пишува порталот Политико.
Еврокомесарот за економски прашања, Валдис Домбровскис, по состанокот на министрите за финансии на ЕУ во Варшава за време на викендот изјави дека Комисијата е подготвена да ги разгледа опциите што го надминуваат она што е веќе на маса, не исклучувајќи ги субвенциите за земјите од чувствителното источно крило на Алијансата.
Неименуван дипломат од мала источна земја на ЕУ за Политико изјави дека дури и ако земјите што граничат со Русија ги зголемат трошоците за одбрана за 20 отсто, тоа нема да биде доволно за да се обезбеди Европа, поради помалата големина на нивните економии.
Се разгледува прашањето за зголемените трошоци на ЕУ за одбраната, при што земјите од Источна и Централна Европа сметаат дека го носат најголемиот дел од побарувачката, според Политико.
Домбровскис се согласува дека земјите што граничат со Русија и Белорусија се изложени на висок ризик и веројатно им е потребна дополнителна поддршка.
Тој ја поддржа идејата за нов меѓувладин фонд, првпат изнесен од бриселскиот тинк-тенк „Бројгел“ минатата недела, кој ќе им овозможи на земјите од ЕУ и оние кои не се членки на ЕУ да соберат средства за вооружување. Со овој предлог се отвори и можноста ЕК да биде директен учесник во фондот.