Денеска ООУ „Братство“ беше домаќин на претставници од ООУ „Вера Циривири-Трена“ по повод потпишувањето Mеморандум за соработка во рамките на проектот за меѓуетничка интеграција. Проектот е поддржан од УСАИД, Македонскиот центар за граѓанско образование, Министерството за образование и од Бирото за развој, а предвидува сите основни училишта да влезат во соработка со партнер-училиште со поинакви етнички и јазични карактеристики.
Координатори на проектот беа директорките на училиштата, Соња Силјановска и Снежана Карас, кои го потпишаа меморандумот за соработка во присуство на претставници од училиштата.
– Меморандумот го потпишуваме токму денес, зашто од основното училиште „Вера Циривири-Трена“ сакаа на нашите ученици да им го честитаат празникот Курбан-Бајрам – рече Соња Силјановска, директорката на ООУ „Братство“. Директорката, пак, на партнер-училиштето „Вера Циривири-Трена, Снежана Карас, рече дека со задоволство ѝ пристапуваат на оваа соработка зашто таа значи многу дружба и многу нови знаења на полето на мултикултурата.
Дечињата од „Вера Циривири-Трена“ на своите другари од партнер-училиштето им го честитаа празникот со специјално изработена честитка, а за возврат беа почестени со традиционална бајрамска баклава.
ОПШТИНА КАРПОШ
Одделение за односи со јавноста