И покрај тоа што туристичките работници од Охрид се жалат дека оваа туристичка сезона во Охрид била најслаба последните неколку години, градските власти во Охрид уверуваат дека по многу параметри сезоната која помина била подобра во однос на минатата година.
На пример, наплатата на туристичката такса за привремен престој за 2013 година до овој период била поголема за 15, 6 % во однос на истиот период минатата година.
Според податоците на општината, бројот на ноќевања од јануари до август оваа година во однос на истиот период минатата година е зголемен за 2,8%. Има намалување кај домашните ноќевања за 12,2 % додека зголемување кај ноќевањата на странски туристи за 16,9%.
„На овој начин се демантираат шпекулациите и претпоставките како е реализирана туристичката сезона во Охрид во изминатиот период од 9 месеци и да ставиме крај на сите тие шпекулации со факти и аргументи. Временските услови до крајот на месец јули беа непогодни за престој на домашни и странски туристи. Податоците кои ние ги имаме добиено говорат за доволна доза на оптимизам“, рече градоначалникот на Охрид Никола Бакрачески.
Тој рече дека од овие бројки бил сосема задоволен.
„Очекувањата во јавноста и шпекулациите кои се појавија во медиумите е дека оваа сезона ќе биде најслабата сезона во изминатите неколку години или неколку децении. Но од статистичките податоци можам да кажам дека сум сосема задоволен, не дека нашите очекувања не беа поголеми.Но ако временските услови во месец јули беа подобри овие бријки ке беа зголемени“, рече Бакраачески.
Мики Трајковски