Македонскиот ракометен шампион Вардар в недела во 19 часот во СЦ „Борис Трајковски“, во рамки на 3.коло од Лигата на шампионите, е домаќин на ПСЖ. Францускиот првак во две кола двапати гостува во Скопје. Во претходното коло беше поразен од Металург.
На редовната прес-конференција на „црвено-црните“ пред дуелот со екипата од Париз, тренерот Андон Бошковски истакна дека ПСЖ е фаворит в недела.
– „Летвичката на резултати“ сега е подигната, најпрвин по нашето реми со Барселона, а потоа и со победата на Металург со ПСЖ. Ова е специфична ситуација мислам дека ќе биде убав натпревар, а ние со борбеност можеме многу да постигне и секој бод ќе биде важен. Во секој случај за Вардар најважен ќе биде следниот натпревар гостувањето во Швајцарија кај Вакер Тун. Одбраната треба да биде на ниво, а голманите во вистински момент да дојдат до бројка од 12-14 одбрани. Во секој случај не треба да ја прифатиме нивната игра и да се тркаме со нив, рече Бошковски.
За квалитетот на неделниот ривал, посочи Бошковски, најголема опасност за нас ќе биде Михаел Хансен.
– Тешко дека Данецот ќе одигра уште еден таков натпревар како против Металург. Но, нивниот „мотор“ на тимот е Даниел Нарцис, а и ПСЖ го има истиот проблем како и ние. И тие имаат проблеми со воиграноста, додаде Бошковски.
Репрезентативниот пикер на Македонија и на Вардар, Стојанче Стоилов за неделниот натпревар рече дека по сите турбуленции во екипата, се подготвени да се надигруваат со ПСЖ.
– Очекувам полна сала, а кога е таква атмосферата играчите имаат посебни мотиви за игра, истакна Стоилов.
Во составот на Вардар за очекување е по повредата да се врати Игор Карачиќ, кој одигра одличен натпревар против Барселона во 1.коло.
Според информациите од клубот, влезници за неделниот натпревар во продажба има уште малку.