Во Собранието на Република Македонија денеска седници ќе одржат комисиите за образование, наука и спорт, за европски прашања, за еднакви можности на жените и мажите, за труд и социјална политика, за економски прашања и за финансирање и буџет.
Статутарна одлука за изменување и дополнување на Статутот на Универзитетот „Гоце Делчев“ – Штип, Предлог-законот за изменување и дополнување на Законот за научно-истражувачката дејност, како и Предлог-законот за изменување и дополнување на Законот за спортот, во второ читање се на дневниот ред на седницата на комисијата за образование, наука и спорт.
Членовите на Комисијата за европски прашања ќе продолжат со надзорната расправа на тема „Користење на фондовите од инструментот за пристапна помош-ИПА во Република Македонија“.
На седницата на Комисијата за еднакви можности на жените и мажите ќе биде презентиран Извештајот за спроведување на Акцискиот план на Република Македонија за имплементација на Резулуцијата на ОН 1325 (жени, мир и безбедност).
За Предлог-законот за дополнување на Законот за вработување и работа на странци, во прво читање, ќе се расправа на седницата на комисијата за труд и социјална политика.
На дневниот ред на Комисијата за економски прашања е Предлог-законот за изменување и дополнување на Законот за трговија, во второ читање.
Со расправата за Предлог-изменување и дополнување на буџетот на Република Македонија за 2013 година, на денешнмата седница ќе продолжат и членовите на комисијата за финансирање и буџет.