Претседателката на Либерално-демократската партија и пратеничка во македонското Собрание, Моника Зајкова, во објава на социјалните мрежи им го честита денешниот празник, Бајрам, на верниците од муслиманската вероисповест.
„Бајрам Шериф Мубарек Олсун! Денеска, кога го одбележуваме крајот на светиот месец Рамазан, ве повикувам сите да ја споделиме радоста, љубовта и солидарноста со луѓето околу нас“, вели Зајкова.
Зајкова додава дека Бајрам е време кое нѐ потсетува на вистинските вредности – меѓусебна почит, разбирање и подадена рака кон секого, без обзир на нашите различности.
„Да не дозволиме денешниот празник да биде само еден момент на радост, туку инспирација да градиме општество во кое секој човек е вреднуван, секој глас е слушнат, а различностите нè зближуваат, наместо да нè разделуваат“, завршува во својата објава претседателката Зајкова посакувајќи им на граѓаните кои го слават денешниот ден среќен и благословен Бајрам, исполнет со мир, хармонија и заедништво!