Општина Струмица се закити со уште едно признание. Познатиот традиционален струмички карневал е прогласен меѓу најуспешните туристички настани за 2013 година.
Признанието го додели Министерството за економија на Република Македонија по повод денот на туризмот, а го прими претседателот на Советот на општина Струмица, Марјан Даскаловски.
Инаку, меѓународниот струмички карневал се најде и на листата на дваесетте најдобри карневали во светот, според листата на интернет – порталот „Арабиан травел њуз“. Покрај струмичкиот, на оваа листа се наоѓаат и престижните карневали во Рио Де Женеиро, Венеција, Париз и други светски познати карневалски градови.
Ова е уште една потврда дека оваа вековна традиција во градот под Царевите кули, оди во нагорна линија привлекувајќи се поголем број учесници и посетители од земјата и странство.
