Руски туристи од идната година се очекува организирано да летуваат во Охрид, што ќе биде реализирано со воспоставување директни авионски чартер линии од Москва до охридскиот аеродром. Тоа се заклучоците од денешната средба на претставниците на Секторот за локален економски развој што Општина Охрид со генералниот менаџер на московската туристичка агенција „7тур“ кој се наоѓа во работна посета на Охрид.
Раководителот на Секторот за локален економски развој Ѓоко Апостолоски истакна дека на руската делегација и се предочени сите позитивни карактеристики на охридскиот туризам од аспект и надлежност на Локалната самоуправа.
– Позитивно би било кога Македонија би влегла како опција на сите туристички саеми, со оглед на тоа што ни беше посочено дека земјава а со тоа и Охрид, речиси и да не се познати за Русите. Ние ќе се потрудиме преку оваа соработка да овозможиме презентација на Охрид како туристичка дестинација. Како локална самоуправа веќе имаме конкретни чекори. Тука е подготовката на пропагандниот туристички материјал кој ќе се подготвува и на руски јазик. Се подготвуваме и за учество на најголемиот европски туристички саем во Москва, изјави Апостолоски после средбата.
Истовремено на денешната средба била разгледувана можноста за промовирање на Охрид како дестинација во најпознатата руска туристичка брошура „Полиглот“, што се печати во милионски тиражи. Во таа насока, најавено е дека во периодот од 11 до 14 ноември во Охрид ќе пристигнат група од 20-тина туристички работници од Русската Федерација, меѓу кои и претставник на посочената брошура „Полиглот“.
