Во Центарот за култура „Антон Панов“ во Струмица се одржува обука на вработените во државната администрација за изучување на знаковниот јазик на глувите и наглуви лица.
Обуката е на иницијатива на пратеникот од ВМРО-ДПМНЕ Славе Гошев, а во организација на Здружението на глуви и наглуви лица од Струмица.
Виолета Голубова, секретар во Здружението, оваа иницијатива е добредојдена и со нејзина реализација ќе се олесни комуникацијата на граѓаните кои имаат потреба од услугите на администрацијата.
– Преку оваа работилница ќе извршиме обука на по еден вработен во државната администрација, а со познавањето на знаковниот јазик ќе надминеме уште една голема бариера во целосното вклопување на оваа група во нормалниот животен тек, нагласи Голубова.
Обуката започна на Денот на глувите и наглуви лица, а Иницијативниот одбор апелира до приватниот сектор, посебно до оние фирми кои врабутуваат лица со оштетен слух, да ја поддржат оваа иницијатива и да испратат свој претставник на обуката.
Во струмичко има регистрирано околу 250 лица со оштетен слух од кои стотина се членови на Здружението на глуви и наглуви лица преку кое ги остваруваат своите права.