Сирија се согласува со резолуцијата на Советот за безбедност на Обединетите нации за уништување на хемиското оружје, но нема да разговара за иднината на претседателот Башар ал Асад, изјави синоќа сирискиот министер за надворешни работи Валид Муалем.
Муалем пред новинарите истакна дека резолуцијата што ја усвои СБ на ОН значи дека опозицијата може да биде цел на санкции на ОН.
– Јас сум согласен со резолуцијата, изјави Муалем во седиштето на ОН, кој во понеделник треба да се обрати на Генералното собрание, додавајќи дека Резолуцијата повикува на глава седум од Повелбата на ОН против тероризмот.
Сирискиот министер за надворешни работи нагласи дека не може да има разговори за иднината на претседателот Асад и дека тоа е запишано во Уставот, додавајќи дека Асад е решен да го заврши својот мандат и повторно да се кандидира.
Асад претходно најави дека изборите ќе се одржат во 2014 година.
Советот за безбедност на ОН усвои резолуција за уништување на сириското хемиско оружје, но не предвидува автоматски санкции против владата на претседателот Асад доколку не биде почитувана.
Петнаесетте земји членки на СБ на ОН едногласно ја поддржа резолуцијата по неколкунеделни интензивни дипломатски активности меѓу Русија и САД.