Доналд Трамп победи и на претседателските избори во Аризона, проектира Едисон Рисрч во саботата, завршувајќи со победа во сите седум сојузни држави и зацврстувајќи ја неговата победа над демократската потпретседател Камала Харис.
Кандидатот на Републиканската партија Трамп, кој до среда наутро обезбеди 270 гласови на Изборното собрание, т.н. Изборниот колеџ кој е потребен за освојување на Белата куќа сега се очекува да има конечни 312 гласа наспроти 226-те на Харис.
Освен Аризона, Трамп ги освои и другите шест клучни држави: Мичиген, Пенсилванија, Џорџија, Северна Каролина, Висконсин и Невада.
Во 2020 година, Џо Бајден го победи Трамп победувајќи во шест од седум, само тесно губејќи ја Северна Каролина и заврши со 306 гласови на Изборниот колеџ наспроти 232 на Трамп.
Трамп, исто така, освои 306 гласа на тоа собрание во неговата победа над Хилари Клинтон во 2016 година.
Асошиетед прес наведува дека Трамп победил на гласањето со 74,6 милиони гласачи низ целата земја, или 50,5 отсто, додека Харис освоил 70,9 милиони гласови или 48 отсто.
Откако Конгресот го потврди гласањето на Изборниот колеџ на 6 јануари, Трамп и неговиот иден потпретседател, американскиот сенатор Џ. Венс, треба да ги преземат функциите на 20 јануари.
Републиканците се блиску до преземање на контролата и врз Претставничкиот дом во Конгресот, што е од клучно значење за непречено спроведување на политиките на новоизбраниот претседател Трамп.
Иако се уште се пребројуваат гласовите од изборите на 5 ноември, републиканците обезбедија 213 места во 435-члениот Претставнички дом, според Едисон Рисрч.
Републиканците треба да освојат уште пет места за да ја задржат контролата врз Претставничкиот дом и веќе имаат доволно обезбедени места за да ја одземат контролата врз американскиот Сенат од демократите.
Според Edison Research, демократите досега освоиле 205 места во Претставничкиот дом. Демократите ќе треба да освојат 13 од преостанатите 17 места за да ја преземат контролата врз таа комора.
Со победата на Трамп на претседателските избори и републиканската контрола на Сенатот, задржувањето на Претставничкиот дом ќе им даде на републиканците можност да ја протуркаат главната агенда за намалување на даноците и трошоците, енергетската дерегулација и граничните безбедносни контроли.
Претседателот Џо Бајден во среда ќе го прими најголемиот политички непријател во Овалната соба, кој почнува да работи на составот на идната влада за да се подготви за историско враќање на власт.
Бајден вети дека ќе обезбеди мирен трансфер на власта и рече дека се надева дека ќе ја „намали температурата“ во земјата. Ситуацијата е многу поинаква отколку во 2020 година, кога Доналд Трамп одби да го признае поразот и ја бојкотираше церемонијата на инаугурација на Џо Бајден.
И тоа откако неговите поддржувачи упаднаа во Капитол, храмот на американската демократија, на 6 јануари 2021 година, за да спречат потврда на победата на демократскиот претседател.
Четири години подоцна, магнатот со недвижности, кој беше цел на два обиди за атентат за време на кампањата и беше обвинет и осуден во кривична и граѓанска постапка, направи неверојатно враќање во Белата куќа.
Доналд Трамп им вети на Американците дека ќе го подобри нивниот животен стандард со намалување на даноците. Републиканецот, исто така, рече дека ќе изврши „масовна“ депортација на мигранти кои илегално се наоѓаат во земјата.