„Фолксваген груп“ двојно ќе ги зголеми производните капацитети во својата фабрика на југот на Кина, за да создаде простор за производство на најновата генерација на моделите „Голф“ и „Ауди А3 Седан“.
Фабриката во Фошан, што е плод на заедничкото вложување на „Фолксваген“ и кинеската „Фав груп“, досега годишно произведуваше по 300.000 автомобили.
Со дополнителна нвестиција од 1,85 милијарди евра и со проширување на капацитетот, оваа бројка ќе се зголеми на 600.000 модели годишно.
Во овој погон веќе почна производството на моделот „Голф“ од седмата генерација, а до крајот на 2013 година од производните ленти ќе излезе и „Ауди А3 Седан“.
Ова е прва фабрика во Кина во која ќе се произведува новата генерација на моделите на „Фолксваген“, што се базираат на MQB платформата, така што од истите ленти истовремено ќе се симнуваат и „Голф“ и новиот „Ауди“ модел.
Кина е најголемиот пазар за „Фолкваген“, со 2,81 милиони продадени автомобили во 2012 година. Во првите осум месеци од 2013 година продажбата во оваа земја порасна за 17,9 отсто, во однос на истиот период од 2012 година, кога изнесуваше 2,05 милиони модели.
Во план е до 2018 година производните капацитети на „Фолксваген“ во Кина да достигнат дури четири милиони возила годишно.