Меѓународните сили на НАТО ќе останат во Косово се додека тоа биде потребно и ќе помагаат во имплементацијата на Договорот меѓу Приштина и Белград, изјави генералниот секретар на Алијансата, Андерс Фог Расмусен.
Расмусен, кој присуствува на 68-то заседание на Генералното собрание на ОН во Њујорк, во изјава за „Гласот на Америка“ нагласи дека Мисијата на НАТО во Косово е „успешна приказна“ и дека „сите страни во регионот го сметаат КФОР за непристрасен гарант на мирот и безбедноста“.
– Почнавме пред многу години со 50.000 војници, а сега имаме само 5.000, што го отсликува значителното подобрување на безбедносната состојба… Нашето присуство ќе продлжи се додека тоа биде потребно, истакна Расмусен.
Тој нагласи дека НАТО ќе помага во имплементацијата на Договорот за уредување на меѓусебните односи, што Приштина и Белград го постигнаа пред неколку месеци во Брисел.