Екстремниот топлотен бран со температури кои достигнуваат и над 43 степени Целзиусови, прашина од Сахара и висока влажност создаваат многу непријатна атмосфера во големи делови на Грција, пренесуваат грчките медиуми. Грција го затвори за туристи древниот Акропол, ги затвори училиштата и стационираше медицински лица низ Атина, поради првиот топлотен бран ова лето.
Се очекува температурите да достигнат 43 степени Целзиусови поради јужните ветрови кои носат топол воздух и прашина од Северна Африка.
Во исто време, ризикот од шумски пожари е многу висок, со што државата е ставена во состојба на висока готовност.
Центарот на грчката престолнина Атина, според грчките медиуми, изгледа напуштен со неколку продавници кои се затвораат веќе наутро.
Грција е една од најпогодените европски земји од климатската криза. Минатата година, зголемените температури предизвикаа смртоносни шумски пожари, а непредвидливите дождови предизвикаа стравотни поплави.