Платформата за социјални медиуми X во сопственост на Илон Маск ги ажурираше своите правила за официјално да дозволи содржина за возрасни.
Според ажурираните упатства, платформата порано позната како Твитер ќе им овозможи на корисниците да споделуваат сексуална содржина се додека таа е консензуална и јасно означена.
Ревидираната политика, која беше ажурирана во текот на викендот, наведува дека „корисниците треба да можат да создаваат, дистрибуираат и консумираат материјал поврзан со сексуални теми сè додека се произведуваат и дистрибуираат со согласност“.
„Сексуалното изразување, без разлика дали е визуелно или писмено, може да биде легитимна форма на уметничко изразување“, наведуваат од компанијата.
„Веруваме во автономијата на возрасните да се вклучат и да создаваат содржини што ги одразуваат нивните сопствени верувања, желби и искуства, вклучително и оние поврзани со сексуалноста.
Изложеноста на графички материјал ќе биде ограничена за децата и возрасните корисници кои ќе изберат да не го гледаат, а на корисниците нема да им биде дозволено да споделуваат содржини „што промовираат експлоатација, објективизација, сексуализација или повреда на малолетници и непристојно однесување“, се наведува во одлуката.
Промената, која првпат беше објавена од TechCrunch, формализира релативно толерантен став кон содржината за возрасни што датира од пред купувањето на Твитер од Маск во октомври 2022 година.
За разлика од платформите како Инстаграм, Фејсбук, ТикТок и Јутјуб, Твитер никогаш експлицитно не забранил голотија и сексуална содржина.