Шефот на кинеската компанија „Гили“, по се изгледа, не е човек кој лесно се откажува од зацртаните цели. Иако директорите на „Волво“ изјавија дека оваа компанија нема да произведува лимузина од виска класа, според најновите најави, Швеѓаните подготвуваат модел во класата на „Ауди А8“, „Мерцедес С класа“ и „БМВ серија 7“.
Иако директорите на „Волво“, Стефан Јакоби и Хакан Самуелсон изјавија дека големата лимузина не се вклопува во „зелениот“ имиџ на компанијата, „големиот шеф од Кина“ за кинеските медиуми изјави дека „Волво“, која е во сопственост на „Гили“, развива нов модел што се базира на продолжената платформа на новата генерација „Волво С80“.
Новиот модел треба да го понесе името „С100“.
Директорот на „Гили“, Ли Шуфу изјави дека „С100“ ќе биде поголем и полуксузен модел од новата генерација „Волво С80“ и во сосема друга категорија од актуелниот модел „С80Л“, што се произведува во Кина.
Моделот „С100“, исто така, ќе биде произведен во Кина, во фабриката во Ченгду, но во овој момент се уште не се знае дали ќе биде извезуван на други пазари.
Ли не изнесе податоци за моторите на овој модел, а тоа е токму полето на кое „Волво“ ќе се сретне со најголемиот број предизвици.
Швеѓаните неодамна соопштија дека ќе се фокусираат на четирицилиндричните мотори и дека полека од употреба ќе ги исфрлаат моторите со пет и шест цилиндри.
Во класата во која имиџот е исклучително важен и во која автомобилите имаат мотори со шест или повеќе цилиндри, моторот со само четири цилиндри може да претставува минус, без разлика на перформансите и емисијата на издувни гасови.
„Волво“ од својата понуда веќе го исфрли В8 моторот на „Јамаха“, што беше вградуван во моделите XC90 и С80.