Основното јавно обвинителство Скопје донесе наредба за спроведување истражна постапка против 33-годишен скопјанец кој во автомобил „ауди Q5“ неовластено држел огнено оружје пиштол марка AG-9 и две рамки со вкупно 30 куршуми.
„Полициски службеници извршиле претрес во автомобилот и го пронашле оружјето, откако претходно осомничениот го вперил пиштолот кон три лица и испукал еден куршум во воздух пред зградата во која живее, а еден од оштетените го удрил по лицето. Истрага е поведена поради основано сомнение дека со тоа сторил кривично дело неовластено изработување, држење, посредување и тргување со оружје и експлозивни материи, а против осомничениот ќе се води и скратена постапка за кривично дело насилство. Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот“, извести ОЈО.