Директорот на Безбедносно-информативната агенција (БИА) на Србија, Александар Вулин, поднесе оставка од функцијата, потврди тој преку соопштение за јавноста.
„САД и ЕУ ја бараат мојата глава како предуслов за невоведување санкции кон Србија. Не ги предизвикав уцените и притисоците кон Србија и српскиот свет, но нема да дозволам да бидам причина за уцени и притисоци. Затоа поднесувам неотповиклива оставка од местото директор на БИА“, пишува Вулин.
„Претседателот Александар Вучиќ и Србија се соочуваат со закани и уцени кои можат да се споредат само со австроунгарскиот ултиматум од 1914 година. Од нас се бара да го признаеме Косово, да ја напуштиме Република Српска и да престанеме да бидеме суверена земја и нација со воведување санкции кон Руската Федерација. Доколку се согласиме на тоа, следното барање би било протерување на кинеските инвестиции, безусловна технолошка и економска зависност од Западот, како и продолжување на политичката и територијална дезинтеграција на Србија и прифаќање на западните вредности во кои нема место за традиционалното семејство и нација, а на крајот и за социјалната правда“, објави Вулин.
Вулин од јули 2023 година е на „црната листа“ на САД. Тогаш, американското Министерство за финансии соопшти дека Вулин, „е вмешан во транснационален организиран криминал, нелегални операции со наркотици и злоупотреба на јавна функција“.