Новинар на Ројтерс загина, а шест други новинари се повредени денеска во јужен Либан додека ја снимале размената на оган на израелско-либанската граница.
„Длабоко сме во тага откако дознавме дека нашиот снимател Исам Абдалах починал“, изјави портпаролот на Ројтерс. Агенцијата додава дека двајца новинари на Ројтерс, Тајер Ал Судани и Махер Назех се повредени.
Меѓу повредените има и новинари од Ал Џезира и АФП.
Ал Џезира потврди дека репортерката и нејзиниот снимател се меѓу повредените. Во гранатирањето се повредени и двајца новинари на француската новинска агенција АФП, изјави извор од агенцијата.
Инцидентот се случил во јужен Либан во близина на границата со Израел. Набргу по гранатирањето, Хезболах објави дека на израелските напади одговорил со директно и соодветно оружје, постигнувајќи точни удари.