Украинската армија тврди дека припадници на „Вагнер“ се вратиле во Бахмут. Тие се повлекле од тој град во мај и ја предале контролата на руската војска. Сепак, заменик-началникот за комуникации на украинската армија Серхиј Череваџи изјави дека поранешните борци на Вагнер се вратиле во Украина и сега работат под руското Министерство за одбрана.
„Неколку стотици од нив одат во наша насока, на источниот фронт“, изјави тој за Си-Ен-Ен.
Истото за Си-Ен-Ен го потврдија и украинските војници кај Бахмут.
„Вагнер е тука“, рече еден од операторите со дронови.
„Се вратија, брзо ги сменија командантите и сега се тука“, додаде тој.
Советникот на украинскиот претседател Михајло Подољак изјави дека припадниците на „Вагнер“ склучиле договори со руското министерство, но тој не сакал да го преувеличува нивното доаѓање на фронтот.
„Запомнете, Вагнер повеќе не постои“, рече Подољак.