Американскиот државен секретар Ентони Блинкен рече дека верува оти Украина е подготвена да преговара со Русија доколку руската страна покаже интерес за дипломатија.
„Кога станува збор за преговори, потребни се двајца за танго. Досега не видовме индикации дека (рускиот претседател) Владимир Путин има некаков интерес за значајна дипломатија. Ако го стори тоа, мислам дека Украинците ќе бидат први кои ќе се ангажираат и ние ќе ги поддржиме“, изјави Блинкен во интервју за ABC.
Тој додаде дека сите сакаат конфликтот да заврши, но, како што наведе, војната мора да заврши под фер и трајни услови кои го одразуваат суверенитетот и територијалниот интегритет на Украина.
Блинкен беше во ненајавена посета на Киев на 6-7 септември, за време на која најави повеќе од 1 милијарда долари безбедносна помош за Украина, вклучително и 5,4 милиони долари запленети средства од руски олигарси.