На Украина и остануваат нешто повеќе од 30 дена пред временските услови да ја нарушат нејзината контраофанзива, според висок американски воен офицер. Во интервју за Би-Би-Си, генералот Марк Мили рече дека постудените услови може да го отежнат маневрирањето за Украина.
Тој призна дека офанзивата оди побавно од очекуваното. „Сè уште се водат тешки борби. Украинците сè уште бележат постојан напредок“, вели тој.
Генералот Мили рече дека е премногу рано да се каже дали контраофанзивата не успеала, но додаде дека Украина „напредува со многу стабилно темпо низ руските линии на фронтот“. „Има уште разумно време, веројатно околу 30 до 45 дена борби во овие временски услови, така што Украинците не завршија. Има незавршени битки, тие не го завршија борбениот дел од она што се обидуваат да го постигнат“, вели тој.
Контраофанзивата на Киев, која беше започната летово и има за цел да ги ослободи териториите окупирани од Русија во Украина, досега наиде на мал успех. Но, украинските генерали тврдат дека ја пробиле застрашувачката прва линија на одбрана на Русија на југ.
„Реков на самиот почеток на оваа војна дека ова ќе биде долго, бавно, тешко и со големи жртви, и тоа е токму она што е“, рече генералот Мили.
Во истото интервју, адмиралот Тони Радакин, началникот на Генералштабот за одбрана на Велика Британија, рече дека „Украина победува, а Русија губи“. „Ова е затоа што целта на Русија беше да ја потчини Украина и да ја стави под своја контрола. Ова не се случило и никогаш нема да се случи и затоа Украина победува“, рече тој.
Тој додаде дека Украина напредува во борбата за враќање на нејзината територија, откако вратила 50 отсто од земјата што Русија ја зазеде. „Во меѓувреме, сојузот на Владимир Путин со Северна Кореја покажува дека рускиот претседател е во состојба на очај“, рече адмирал Радакин.
„Алијансата е одраз на катастрофалната грешка што Русија ја направи со инвазијата на Украина“, рече Радакин. „Треба да се погледне фактот дека руската економија е под притисок, санкциите имаат поголем ефект. Нема меѓународни партнери. Загубени се половина милион луѓе кои ја напуштија земјата. Има најмалку уште еден милион кои сакаат да ја напуштат земјата“, рече тој.