Руски пилот на хеликоптер, кој пребегна во Украина во август, откри детали за операцијата на прелет во неговиот борбен хеликоптер Ми8 во интервју објавено од украинското разузнавање. Пилотот Максим Кузминов во интервју објаснил како го планирал своето бегство и зошто се чувствувал принуден да го стори тоа, пишува CNN.
„Контактирав со претставници на украинските разузнавачки служби, ја објаснив мојата ситуација и тие ми ја понудија оваа опција: „Ја гарантираме вашата безбедност, гарантираме нови документи, гарантираме паричен надоместок“, рече пилотот во видеото објавено во понеделникот.
Директорот на украинското воено разузнавање Кирило Буданов во август откри како украинските власти успеале да му помогнат на пилотот.
„Успеавме да создадеме услови целото негово семејство да го извлечеме незабележано и конечно да создадеме услови да полета со екипаж што не знаеше што се случува“, рече Буданов и додаде: „Беа двајца други луѓе со него, екипажот има вкупно три лица. Кога сфатиле каде слетале, се обиделе да избегаат. За жал, биле елиминирани. Ние би сакале да ги фатиме живи, но така испадна.”
Во интервју објавено во понеделникот, пилотот опиша како се одвивал настанот: „За време на еден лет сфатив дека сум блиску до границата. Ја пренесов мојата локација. Мислев дека вреди да се обидам бидејќи не бев толку далеку. Донесувајќи ја конечната одлука, летав на екстремно мала височина во режим на тишина на радио. Никој не знаеше што се случува“.
Пилотот вели дека успеал да слета во Украина, каде што го пречекале украинските власти. Околностите на интервјуто се нејасни, но изгледаше дека пилотот слободно зборува. Во тоа време, неофицијален руски Телеграм канал, изненаден од податоците за летот, објави дека хеликоптерот Ми-8 полетал за Украина и по грешка слетал во централниот регион Полтава.
– Никој досега не го направил тоа, но се надевам дека сега ќе има повеќе – рече Буданов.