Фудбалерите на АЕК вечерва во Загреб го победија Динамо со резултат 2:1 (0:1) во првиот натпревар од третото коло од квалификациите за Лигата на шампионите.
Динамо поведе со голот на Марко Булат во 39. минута. Гостите израмнија со голот на Стивен Зубер во 59. минута, а победата на грчкиот шампион му ја донесе Константинос Галанопулос во 90. минута. Реваншот се игра во сабота во Атина.
Првиот натпревар од третото квалификациско коло за Лигата на шампионите меѓу АЕК и Динамо требаше да се одигра на 8 август во Атина, но тој беше откажан поради конфликтот меѓу навивачите на двата клуба. Во тие судири загина навивачот на грчкиот клуб Михалис Кацурис, а осум лица беа повредени.