Полицијата употреби солзавец и водени топови за да растера демонстранти од главниот плоштад во Мексико Сити и уапси 31 човек со што презеде контрола врз центарот на градот по повеќенеделни протести на наставниците.
Федералната полиција синоќа се судри со дел демонстранти додека го расчистуваше плоштадот Сокало бидејќи в недела на тоа место претседателот Енрике Пења Нието треба да предводи традиционална прослава во знак на сеќавање на хероите од мексиканската борба за независност.
Наставниците кампуваа на плоштадот поради протест за реформи во образованието со кои е предвидено воведување посторги стандарди за наставниците и укинување на дел привилегии како што е можноста нивни деца да наследат нивно работно место.
Министерството за внатрешни работи соопшти дека меѓу уапсените нема наставници, но не даде детали кој се уапсените. Црвениот крст соопшти дека се повредени најмалку 30 демонстранти.
