Денеска започнаа градежните работи за изградба на пешачка (трим) патека во Банско, активност кој се реализира во рамките на спроведувањето на проектот „Податоци за Туризам”, финансиран од Европската Унија преку програмата за прекугранична соработка меѓу Македонија и Грција.
Вкупниот грант од ИПА програмата за реализација на овој проект изнесува 134.500 евра.
Пешачката трим патека ќе биде со широчина од 2 метри и должина од околу 700 метри и ќе се протега од центарот на селото до хотелот „Цар Самуил“, поврзувајќи ги кружно најзначајните културно – историски и туристички обележја во Банско. Ќе биде поплочена со бекатон плочки и опремена со 30 клупи за одмор на рекреативците, а истата ќе биде и осветлена со 40 канделабри.
Проектот „Податоци за Туризам” содржи повеќе активности насочени кон развој на туризмот, промоција на туристичките потенцијали, како и инфраструктурни активности за мапирање и уредување на патеки за развој на алтернативните форми на туризам.