Првиот вицепремиер Артан Груби денеска на конференцијата „Бехтел и Енка – можности, предизвици и одговорности“ порача дека не знае кој нормален политичар би се впуштил во корупција со американска компанија.
„Не познавам политичар во нашата земја, во нашиот регион, во нашиот континент, во нашиот свет кој што ќе си дозволи да се впушти во коруптивни дејствија со компании како Бехтел и Енка или пак со држави како САД и Турција“, порача Груби.
Ако се проневери еден денар од проектот за изградба на Коридорите 8 и 10д на Бехтел и Енка да скапеме во доживотен затвор, рече првиот вицепремиер и министер за политички систем Артан Груби.
„Ние сме подготвени ова да биде најчистиот, најдостоинствениот проект во земјата и најодговорно тврдам дека хајката против е само за дневна политика и партиски калкулации и нема друг мотив. Ниту јас, ниту Бочварски, ниту Бесими, па најмалку премиерот Ковачевски би си дозволиле себеси да се впуштиме во било какво коруптивно дејствие. Ова ни е животен проект на сите нас и сакаме да бидеме успешен“, вели Груби.
Груби информираше дека досега не се исплатени средства а првите авансно плаќање за почеток на градежни работи и тоа ќе биде објавено на порталот Отворени финансии.
-Измените на Законот за работни односи, што се дел од пакетот закони за забрзување на реализацијата на проектот, не значат експлоатација на работниците и злоупотреба на нивните права. Не се работи за 60 часови работа, туку за дополнителни часови со согласност на работниците, рече Груби.
Според Груби, во Договорот никаде не стои исплата на пенали, а домашните градежни компании ќе имаат голема корист во тек на целиот градежен процес со тоа што над 51 процент од работите ќе биде од домашни ресурси.