Австралија најави директен пат до државјанство за Новозеланѓаните кои живеат во земјата, со што ги поништи контроверзните визни правила еден ден пред посетата на премиерот на Нов Зеланд, Крис Хипкинс. Пред посетата на главниот град на државата Квинсленд, Бризбејн, Хипкинс го поздрави овој потег како најголемо подобрување во правата на Новозеланѓаните кои живеат во Австралија во една генерација.
Промените, кои стапија на сила во јули, значат дека Новозеланѓаните кои живееле во Австралија четири или повеќе години можат да аплицираат за државјанство без претходно да бидат постојани жители, рече австралискиот премиер Ентони Албанес.
„Знаеме дека многу Новозеланѓани се тука со виза од специјална категорија додека одгледуваат семејства, работат и ги градат своите животи во Австралија. Затоа, горд сум што можам да ги понудам придобивките од државјанството“, додаде Албанес.
Нов Зеланд долго време се залага за промени откако се сменија визните правила во 2001 година, што им отежнува во Австралија да добијат државјанство. Реформата ќе ги усогласи правата на Новозеланѓаните повеќе со правата на австралиските иселеници кои живеат во Нов Зеланд, соопшти австралиската лабуристичка влада.
Според податоците на австралиското Министерство за надворешни работи и трговија, во Австралија живеат околу 670 илјади државјани на Нов Зеланд, додека во Нов Зеланд се околу 70 илјади Австралијци.