Руската артилерија изведува напади на патиштата кон Бахмут, со цел да стави крај на опкружувањето на овој град во источна Украина.
Ројтерс забележа интензивно руско гранатирање на патиштата што водат западно од Бахмут, за што рече дека е очигледен обид да се блокира пристапот на украинските сили до и од градот.
Украинските војници работеа на поправка на оштетените патишта, а повеќе војници се упатија кон линијата на фронтот, што е знак дека Украина се уште не е подготвена да се откаже од градот, наведува агенцијата.
На запад, Украинците ископаа нови ровови за одбранбени позиции.
Командантот на копнените сили на Украина, Олександр Сирски, вчера го посети Бахмут за да ги информира локалните команданти за тоа како да го зајакнат одбранбениот капацитет на силите на фронтот.
Денис Јарославски, командант на единицата на украинската армија во Бахмут, за ТВ Еспресо изјави дека на делови од одредени единици им било наредено да се преселат на побезбедни позиции, опишувајќи ја ситуацијата во петокот како колеж на двете страни.
Сопственикот на руската приватна армија на Вагнер, Евгениј Пригожин, претходно изјави дека градот е речиси целосно опколен и дека само еден пат е отворен за украинските војници.