Американскиот претседател Џо Бајден денеска ќе се сретне со лидерите на источното крило на НАТО за да покаже поддршка за нивната безбедност откако Москва го суспендираше историскиот договор за контрола на нуклеарното оружје.
Бајден доцна во понеделникот пристигна во Варшава по ненадејната посета на Киев само неколку дена пред првата годишнина од руската инвазија на Украина на 24 февруари.
Во време на највисоки тензии меѓу Русија и Западот во децениите по Студената војна, Бајден синоќа им се обрати на илјадници во центарот на Варшава и рече дека мора да се спротивстави на „автократите“ како рускиот претседател Владимир Путин.
Неколку часа претходно Путин упати низа критики до западните сили, обвинувајќи ги за војната во Украина. Путин се повлече и од Новиот СТАРТ договор за контрола на оружјето и предупреди дека Москва би можела да продолжи со нуклеарните тестови.
Бајден денеска ќе се сретне со персоналот на американската амбасада во Варшава, пред да ги собере лидерите на Букурештската група од девет земји од источното крило на НАТО, кои се приклучија на западната воена алијанса откако беа под доминација на Москва за време на Студената војна.