Бројот на туристи кои го поминале летниот одмор на струшкото крајбрежје е зголемен, оценуваат угостителите и туристичките работници од Струга.
Ана Јанческа, менаџер во хотелот „Дрим“, смета дека оваа сезона е подобра од претходната и оти бројот на туристи е поголем од лани.
– На почетокот на туристичката сезона, мај и јуни беа одлични месеци и тоа не само со туристи летувалци, туку и со учесници на семинарскиот и конгресниот туризам. Поради временските услови во јули бројот на ноќевања беше намален, но затоа во август продолживме со исто темпо како и претходните месеци и тоа посебно за време на ракометниот турнир и Струшките вечери на поезијата, изјави Јанческа, нагласувајќи дека сега продолжува периодот на семинари.
Позитивна оценка за летната туристичката сезона, иако официјално не е завршена, даде и Елизабета Попоска од Туристичката агенција „Полет“. Септември, според неа, е најатрактивен за одмор и патувања, но смета дека е потребна посебна стратегија за подобрување на понудата на гостите кои одморот го поминуваат во градот на поезијата.
– Генерално сме задоволни од туристичката сезона иако се уште не е завршена, бидејќи септември е најдобриот месец за туристичките патувања. Резултатите ќе се сумираат подоцна, меѓутоа секогаш на крајот на сезоната останува мислењето дека можело повеќе и подобро. Секоја сезона се трудиме да го постигнеме максимумот, рече Попоска.
Покрај гостите од Македонија, ова лето Струга ја посетиле и туристи од Холандија, Австрија, Германија, Норвешка, Србија, Албанија.