Новата година, по пауза од две години, Грците ќе ја дочекаат без никакви мерки и рестрикции поради Ковид-19, додека пак општина Атина најавува спектакуларен пречек на плоштадот Синтагма, јави дописничката на МИА од Атина.
Дочекот на 2021 беше за време на целосен карантин, а лани само неколку дена пред 31 декември поради драстично зголемениот број новозаразени беа воведени мерки, угостителските објекти беше дозволено да работат до два часот по полноќ, но без музика и со забрането е стоење и паралелно беа откажани сите јавни празнични прослави.
Оваа година, сликата е сосема поинаква, рестораните, баровите и слично, не само што ќе работат без никакви ограничувања, туку и веќе се целосно резервирани, а од општина Атина организираат дочек во центарот на градот.
Најавија музичко шоу на плоштадот Синтагма, проследено со голем огномет токму на полноќ, а паралелно, планирана е и отворена забава со грчки диџеи на атинскиот пазар.
Исто како и во пресрет на Божиќ, така и сега, во изминатите денови Грците ги преплавија улиците во Атина или за подготовка за новогодишната ноќ или да купат подароци за најблиските или едноставно да се прошетаат и да ја почувствуваат предновогодишната атмосфера во грчката метропола.
Извор: МИА