Претседателот на Владата на Република Македонија, Никола Груевски упати писмо до претставникот на ОБСЕ за слобода на медиумите, Дуња Мијатовиќ во кое се заблагодарува за интересот кој го покажувала за судскиот предмет на новинарот Томислав Кежаровски.
Груевски укажува дека заслужува почитнејзината загриженост за мерката притвор која му е изречена на Кежаровски, но обрнува внимание дека појдовните претпоставки врз основа на кои ги темели тезите и залагањата, не целосно кореспондираат со фактичката состојба, како и со правниот поредок и овластувањата кои ги има извршната власт.
Владата на Република Македонија, посочува, во целост се залага за почитување на принципот на владеење на правото и за целосно почитување на принципот на поделба на државната власт на законодавна, извршна и судска како темелни вредности на уставниот поредок на земјата .
„Имајќи го во предвид наведеново, се надевам дека ќе се сложите со мене дека не би смеело да се дозволи поедини граѓани да имаат привилегиран третман во однос на почитувањето на обврските кои им се налагаат со одделни закони, во зависност на тоа со каква професија се занимаваат. Ниедна професија не смее да биде амнестирана од законот, вклучувајќи ја тука и професијата новинар, која по својата благородност и значајност за демократските процеси во една држава можеби предничи во однос на повеќето професии. Исто така, се надевам дека ќе се согласите со мене дека начелото на поделба на власта не дозволува на извршната власт да интервенира и дерогира одредени судски одлуки, колку и да не се согласува со истите и колку и да таквите одлуки можат да наштетат на имиџот на земјата“, и пишува Груевски на Мијатовиќ
Груевски се согласува дека затворањето на новинари за нивното пишување не е прифатливо во едно демократско општество, но, вели, Кежаровски не е притворен заради неговото пишување, туку затоа што е обвинет за повреда на Законот за заштита на сведоци, што е пропишано како кривично дело .
„Непримерно е да се доставува копија од ова писмо на претседателот на Кривичниот совет на Основниот Суд Скопје И, бидејќи колку и да е тоа добронамерно, истото може да биде сфатено како своевиден притисок на судот, што верувам не е Ваша интенција. Од истите причини, би сакал да истакнам дека е непримерно да барате и асистенција од мене, како претседател на Владата, да Ви се дозволи да го посетите г. Кежаровски во притвор. Посетата на притвореници е прецизно регулирана со Законот за кривична постапка, каде што таксативно е наведено кој може да посети притворено лице. Јас не би се осмелил да судам дали Вие имате право или не да го посетите, туку само би истакнал дека е потребно да се поклони верба во надлежните судии, кои се единствено овластени да одлучат на кого може да му се дозволи да направи посета и дека секоја интервенција на извршната власт би го поткопала уставниот поредок на земјата и би ги загрозила основните вредности на едно демократско општество“, пишува Груевски.
Владата, вели, како и во сите судски предмети, целосно се држи настрана од предметот на Томислав Кежаровски. Ниту Владата побарала да му се изрече мерка притвор на Кежаровски, ниту влијаела на надлежните судии во одлучувањето по оваа мерка.