Тимот нуркачи на МВР од Специјалната антитерористичка единица Тигар поради временските услови попладнево ја прекина потрагата по лицето кое утрово скокна во водите на реката Вардар. Во потрагата по давеникот учествувале околу дваесетина лица од повеќе спасувачки служби. До денешното завршување на потрагата пребарен е текот на Вардар од Ново Лисиче до Долно Лисиче.
Спасувачките служби со чамци го пребарувале текот на реката, а неколку екипи брегот на Вардар. Нуркачки екипи пак ги пребарувале недостапните и длабоки места на Вардар, но без успешно. Како што соопшти Центарот за управување со кризи (ЦУК), потрагата ќе продолжи рано наутро заедно со тимови на Црвениот крст и Дирекцијата за заштита и спасување.
Од ЦУК информираат дека денеска е пребаран потегот од мостот „Близнак” до Железничкиот мост и уште три километри во правец кон селото Долно Лисиче.
Утрово во 6 часот на 112 во Центарот за управување со кризи е добиено известување дека непознато лице од мостот „Близнак” на булевар „Србија” се фрлило во речното корито на Вардар.
