Во хеликоптерската несреќа што се случи денеска на југот на Италија, загинаа седум лица, меѓу кои и семејство словенечки туристи, јавија италијанските медиуми.
Хеликоптерот исчезна од радарите во рурална област во регионот на Пуља, а воздухопловните сили и пожарникарите организираа потрага по исчезнатиот авион. Локалните власти соопштија дека хеликоптерот набрзо бил пронајден и дека седум лица загинале.
Меѓу загинатите има и четиричлено семејство од Словенија, меѓу кои и 13-годишно девојче, јавуваат локалните медиуми.
Останатите жртви се локален лекар и двајцата пилоти на хеликоптерот.
Се претпоставува дека хеликоптерот, кој летал меѓу регионот Пуља и италијанските острови Тремити во Јадранското Море, се урнал поради лошото време.