Израелските сили денеска убија најмалку четворица Палестинци во одделни инциденти, вклучително и еден кој нападна со нож полицаец во Источен Ерусалим и тројца други во израелските рации на Западниот Брег.
Насилството ескалира додека се пребројуваат конечните гласови во Израел по парламентарните избори во вторникот и се очекува поранешниот премиер Бенјамин Нетанјаху да се врати на власт благодарение на стабилното мнозинство предводено од екстремно десничарските сојузници.
Од почетокот на оваа година, повеќе од 130 Палестинци се убиени во израелско-палестинските конфликти на Западниот Брег и Источен Ерусалим, што е најмногу од 2015 година.
Насилството се интензивираше оваа пролет кога во бранот палестински напади загинаа 19 лица во Израел.
После тоа, започна воена операција за уништување на екстремистичките мрежи.
Во последните недели повторно се зачестија нападите против Израелците, во кои загинаа најмалку три лица.
Извор: МИА