Францускиот претседател Емануел Макрон и германскиот канцелар Олаф Шолц денеска имаа „пријателски“ и „конструктивен“ разговор, соопштија германски дипломатски извори.
Состанокот во Париз ќе доведе до „многу добра и многу интензивна соработка“ во наредните недели, додаде изворот. Според него, Макрон и Шолц биле „со исти идеи во однос на главните насоки“ на политиката.
Претходно беше соопштено дека двајцата лидери ќе разговараат за одбраната, макроекономските прашања и енергијата на работниот ручек во претседателската палата. Не е планирана прес-конференција по нивната средба.
Денешната средба на Шолц и Макрон во Париз претставува обид да ги надминат тензиите произлезени од различните ставови за повеќе теми, од енергетските и економските прашања до иднината на европската одбрана.
Двете најголеми европски економии традиционално се движечката сила зад клучните одлуки во Европската Унија, вклучително и обезбедувањето милијарди евра, кои се заеднички долг, за да се преброди пандемијата на Ковид.
Но, се чини дека француско-германскиот мотор се заглави, што потенцијално го одложи донесувањето одлуки токму кога ЕУ се бори со акутните предизвици од руската војна во Украина до зголемените цени на енергенсите, пишува Блумберг.
Извор: МИА