ВМРО-ДПМНЕ му се заблагодарува на претседателот на СДСМ, Зоран Заев зашто, како што велат им дал можност да се пофалат со сработеното.
Иво Ивановски од ВМРО-ДПМНЕ на прес-конференција наброја дел од две илјади и стоте ветувања за кои рече дека се исполнети досега, како набавката на современа медицинска опрема во вредност од 100 милиони евра, темелна реконструкција на македонските болници во вредност на нови 100 милиони евра, намалени цени на лековите, бесплатно здравство за секого, компјутер за секое дете, задолжително средно образование, намалена партиципација на факултетите, бесплатни учебници, отворање нови универзитети, директни инвестиции во образованието итн.
Како што посочи тој, платите се неколкукратно зголемени, има минимална плата, се градат социјални станови, македонските граѓани можат да го откупуваат дворното земјиште на индивидуалните куќи и станбените згради по само едно евро за метар квадратен, се откупува земјиштето, се намалуваат трошоците за одобренија за градба, а Македонија има четири позитивни извештаи од Европската Комисија.
Воедно сакаме да им заблагодариме на колегите од СДСМ и поради една друга работа. Имено со пресконференцијата на Зоран Заев ни дадоа шанса да направиме промоција на нашите напори, и реформи кои ги превземаме во полињата каде имаме децениско назадување. Ние за разлика од СДСМ и Заев нема да ја дезинформираме јавноста и со аргументи и факти ќе дебатираме. Во однос на инфрастуктурните објекти, изградбата на патишта Зоран Заев лаже кога вели дека ништо не е направено, употребувајќи погрешни информации. Ние досега имаме инвестирано големи средства во инфраструктурата. Досега заклучно со 2012 изградени и рехабилитирани се вкупно 190 локални патишта во вкупна должина од 412 километри во вредност од безмалку 30 милиони евра, а отпочната е изградбата и рехабилитацијата на 105 локални патишта со вкупна должина од 216 километри во вредност од безмалку 20 милиони евра во 43 општини, операција која е во тек – рече Ивановски.